Kwa
mujibu wa kifungu na 3(2) (a) cha Sheria ya Huduma kwa Jamii ya mwaka
2002 kifungo cha nje ni utaratibu ambao unampa fursa mfungwa kutumikia
kifungo chake nje ya gereza kwa kufanya shughuli/kazi zisizo na malipo
kwa manufaa ya jamii.
Utaratibu
huu hutolewa kwa wafungwa ambao vifungo vyao havizidi miaka mitatu bila
kujali wana faini au hawana. Wapo wahalifu wanaohukumiwa moja kwa moja
mahakamani kwenda kutumikia kifungo cha nje na wengine huingia gerezani
kwanza na baadaye utaratibu wa maombi maalum hufanyika ili mfungwa
husika kwenda kutumikia kifungo kwa utaratibu huo.
Sheria
ya Magereza Sura ya 58 kifungu Na. 52 (1) (2) inatoa utaratibu wa
kumuondoa mfungwa aliyepo gerezani huku akiwa ana sifa ya kutumikia
kifungo chake kwa utaratibu wa huduma kwa jamii.
Kifungu
hicho cha Sheria kinaeleza kuwa pale ambapo Mkuu wa gereza
atajiridhisha kuwa kuna mfungwa ambaye ana sifa ya kutumikia kifungo
chake chini ya utaratibu wa huduma kwa jamii, atamshauri mfungwa huyo
juu ya utaratibu huo kwa kuzingatia sifa alizonazo na ikiwa mfungwa huyo
ataridhia kuachiliwa kwake katika utaratibu wa huduma kwa jamii, Mkuu
wa Gereza atawasilisha maombi maalum katika Mahakama iliyomfunga kwa
ajili ya maandalizi ya kuachiliwa kwa mfungwa huyo katika utaratibu wa
huduma kwa jamii.
Mahakama
baada ya kupokea maombi hayo, itafanya uchunguzi kulingana na kifungu
Namba 3 cha Sheria ya Huduma kwa jamii na ikijiridhisha kuwa mfungwa
husika ana sifa za kutumikia katika utaratibu wa Huduma kwa jamii,
Mahakama husika itatoa amri ya kuachiliwa kwa mfungwa huyo chini ya
utaratibu huo.
Aidha,
Usimamizi na Utekelezaji wa adhabu hii husimamiwa na Idara
inayojitegemea ya Huduma kwa Jamii iliyopo chini ya Wizara ya Mambo ya
Ndani ya Nchi.
Mfungwa
anayetumikia kifungo cha nje ni lazima aishi kwa kufuata Sheria na
masharti aliyopangiwa. Masharti hayo ni kuwa chini ya uangalizi maalum,
kutoondoka nje ya Mkoa bila kibali na kuhakikisha kuwa hatendi kosa
lolote mpaka muda wake wa kifungo chake utakapokamilika.
Imetolewa na;
Lucas Mboje, Mrakibu Msaidizi wa Magereza,
Afisa Habari wa Jeshi la Magereza,
DAR ES SALAAM
09 Februari, 2016
