Jumamosi hii kwenye uwanja wa Sokoine jijini Mbeya ‘utapigwa’ mchezo wa ligi kuu ya soka Tanzania bara ambao utazikutanisha timu mbili kutoka jiji hili kubwa katika eneo la nyanda za juu kusini yaani Mbeya City Fc na Tanzania Prison.
Huu ni mchezo wa nne kwa timu hizi kukutana uwanjani awali mara mbili kwenye msimu uiopita na mara moja mzunguko wa kwanza na jumamosi hii itakuwa mara pili katika msimu huu hivyo kukamilisha michezo minne.
Msimu uliopita City ilifanikiwa kushinda michezo yote miwili ikiwa ni ushindi wa bao 2-0, yaliyofungwa na Peter Mapunda dakika ya 67 na Deogratius Julius dakika ya 79, katika mchezo wa kwanza na 1-0 mzunguko wa pili bao lililofungwa na Paul Nonga
Kwa maana hiyo Mbeya City itaingia kucheza mchezo wa jumamosi ikiwa mbele kwa kushinda mara mbili katika michezo mitatu huku Prison wakiingia uwanjani wakijivunia sare ya mabao 2-2 kwenye mchezo wa kwanza msimu huu kwa mabao yaliyowekwa kimiani na Paul Nonga na Temi Felix kwa upande wa City huku Boniface Hau na Nurdin Chona wakifunga upande wa Prison mchezo uliochezeshwa na mwamuzi Simon Mbelwa wa Pwani.
Ukitizama kwa makini unaweza kugundua kuwa mchezo huu ni tofauti kabisa na iliyotangulia hapo awali kwa sababu umekuja kwenye wakati ambao kila timu inahitaji matokeo ili kusogea sehemu nyingine kwenye msimamo wa ligi, kwa vyovyote vile utakuwa mchezo mgumu na wenye kila aina ya ushindani.
City inahitaji matokeo ili kuendelea kujikita kwenye nafasi ya nne iliyopo sasa kwenye msimamo wa ligi, huku Prison ikitafuta matokeo kujaribu kujipapatua mkiani kuepuka kushuka daraja huku ikichagizwa na ushindi iliyoupata juma lililopita kwa ‘kuidabisha’Mgambo Shooting ya Tanga mabao 2-0.
Kuelekea Mchezo huo Kocha Juma Mwambusi amesema huu ni mchezo muhimu pengine kuliko yote iliyopita kwa sababu matokeo kwenye mchezo huo yataihakikishia City kuchukua nafasi ya nne ambayo pia wadhamini wa ligi hutoa zawadi kwa timu inayokuwa imefanikiwa kushika nafasi hiyo.
“Ni mchezo muhimu na mgumu kulingana na mazingira halisi kwa timu zote mbili, kwetu sisi ni muhimu zaidi kwa sababu tunahitaji nafasi ya nne ambayo pia ina zawadi kutoka kwa mdhamini, tunafahamu ndugu zetu wako kwenye wakati mgumu zaidi na wanataka kuepuka kushuka daraja lakini bahati mbaya kwao nasi tunahitaji hiyo nafasi kwa maana hiyo hizi zitakuwa ni dakika 90 ngumu kuliko zote zilizowahi kutukutanisha” alisema.
Licha ya kujigamba kushinda Kocha wa Prison Mbwana Makata ana wasiwasi mkubwa kuhusu uwezo wa kikosi cha Mbeya City Fc hasa ukizingatia ushindi mzuri wa mabao 2-0 katika michezo iliyopita lakini ameapa kupambana kutafuta matokeo.
“Mbey City ilipata matokeo dhidi ya Simba na Kagera Sugar, hili jambo ambalo limetustua lakini tuko tayari kupambana muda wote wa mchezo hiyo jumamosi na tunataka kushinda ili tuwe kwenye nafasi nzuri” alisema Makata.
